असोज ३१ महोत्तरी । महोत्तरीको महोत्तरी गाउँपालिका वडा नम्बर–३ डाम्ही मडईकी एक महिलाको हत्या भएको तीन दिनपछि प्रहरीले आरोपितलाई पक्राउ गरेको छ ।
४२ वर्षीया शिलादेवी झालाई बोक्सीको आरोप लगाउँदै उनका देवर संजय झाले हत्या गरेको महोत्तरी प्रहरीले आइतबार पत्रकार सम्मेलनमार्फत जानकारी गराएको छ ।
भाउजूसँगको लेनदेन र अन्य समस्याका कारण उनले बोक्सीको आरोप लगाई शिलादेवीको हत्या गरेको प्रहरीले पत्रकार सम्मेलनमा बतायो ।
शिलादेवीले दिएको केरा खाँदा संजयकी श्रीमती रिंकु झाको गर्भ तुहिएको र मुखबाट फिँज आउँदा अस्पतालमा उपचार गराएपनि ठीक नभएकाले उनी बोक्सी नै रहेको भन्दै संजयले भाउजूको हत्या गरेको जिल्ला प्रहरी कार्यालय महोत्तरीका प्रहरी उपरीक्षक दिनेश आर्चायले बताए ।
शिलादेवीको हत्या नगर्दा परिवार सुखसँग बस्न नसक्ने धार्मिक अन्धविश्वासको कारण देवर संजयले भाउजूको हत्या गरेको उनले जनाए ।
शिलालाई संजयले दिएको १२ लाख ३९ हजार सापटी फिर्ता नगरेकोले पनि उनको हत्या भएको हुनुपर्ने भनाई महोत्तरी प्रहरीको छ ।
शिलादेवी घरमा सुतिरहेको अवस्थामा बिहीबार राति टाउकोमा हथौडा प्रहार गरी संजयले उनको हत्या गरेको स्वीकारे प्रहरी उपरीक्षक आचार्यले जानकारी दिए ।
बिहिबार बिहान ३ बजेको समयमा शिलादेवीको टाउकोमा हथौडाले हानेर हत्या गरी संजय पुनः जनकपुर फर्किएको प्रारम्भिक अनुसन्धानबाट खुलेको एसपी आचार्यले बताए ।
आरोपित संजय जनकपुरधाम उपमहानगरपालिका–२४ स्थित सोनापाडामा बसेर मजदुरीको काम गर्दै आएका थिए ।
