कञ्चनपुर – नेपालका लागि इजरायली राजदूत हानान गोडर महेन्द्रनगर स्थित विपिन जोशीको घरमा पुगेका छन् । आइतबार इजरायली राजदूत गोडर भीमदत्त नगरपालिका ३ भाँसी स्थित विपिन जोशीको घरमा पुगेका हुन् । गत २० असोजमा प्यालेस्टाइनी हमास समुहले इजरायलमाथि हमला गर्दा हमास समुहको नियन्त्रणमा रहेका विपिन जोशीको घरमा पुगेका हुन् ।
घटना घटेको झण्डै ८ महिना पछि इजरायली राजदूत विपिनको घर पुगेर उनले उद्धारका लागि आश्वासन दिएका छन । विपिन जोशीका बाबु महानन्द जोशीले छोराको रिहाईका लागि राजदूतसँग अनुरोध गरेका छन् ।
विपिन जोशीका परिवारको अनुरोध अनुरूप इजरायली राजदूतले दुखद घटना भएको भन्दै उद्धारका लागि इजरायली सरकारले पहल गरिरहेको र नेपाली विद्यार्थी विपिन जोशीको रिहाईका लागि प्रतिबद्धता जाहेर गरेको परिवारजनले जनाएका छन । विपिन जोशीका दाजु किशोर जोशीले इजरायली राजदूतले पीडित परिवारसँग विपिनको रिहाईका लागि पहल गर्ने आश्वासन दिएको बताए ।
‘इजरायली राजदूत सहितको ४-५ जनाको टोली हाम्रो घर पुगे र उनीहरूलाई हामीले स्वागत गरे, ‘उनले भने, ‘राजदूत नै हाम्रो घर पुगेपछि केही आशा जागेको छ ।’ यस अघि विपिनको रिहाईका लागि घर परिवारले गृहमन्त्री, परराष्ट्रमन्त्री, प्रधानमन्त्री, राष्ट्रपतिसम्म भेटघाट गरेर अनुरोध गरेका छन । सुदूरपश्चिम विश्वविद्यालय कृषि विज्ञान सङ्कायका विद्यार्थी ‘लर्न एण्ड अर्न’ कार्यक्रम अन्तरगत इजरायल गएका थिए।
