महेन्द्रनगर । कञ्चनपुरको बेलौरी नगरपालिकामा भएको खाती दम्पत्ती हत्या प्रकरणमा स्थानियकै संलग्नता रहेको पाइएको छ ।
साउन १६ गते राती १ बजे बेलौरी नगरपालिका–७ का ६३ वर्षिय घनश्याम खाती र उनकी श्रीमती ४५ वर्षिया बेली देबीमाथी धारिलो हतियार प्रयोग गरि आक्रमण भएको थियो ।
उत्त घटनामा श्रीमती बेली देबीको घटनास्थलमै मृत्यु भएको थियो भने श्रीमान घनश्यामको बाकेँको नेपालगञ्ज मेडिकल कलेजमा उपचारका क्रममा आइतबार मृत्यु भएको हो ।
खाती दम्पतीको हत्यामा संलग्न भएको आरोपमा प्रहरीले ४ जनालाई पक्राउ गरेको छ । बेलौरी नगरपालिका–७ भगतपुरका ५३ वर्षीय प्रकाश ऐर, ३५ वर्षीय दिनेश राना, बेलौरी नगरपालिका–६ हात्तीबोझाका ३६ वर्षीय होरी राना र कृष्णपुर नगरपालिका–२ का ४५ वर्षीय रबि रानालाई प्रहरीले पक्राउ गरेको छ ।
पक्राउ परेका प्रकाश र दिनेश खाती दम्पतीकै छिमेकी हुन् । घटनामा संलग्न रहेकालाई सोमबार कञ्चनपुर प्रहरीले पत्रकार सम्मेलन गरेर सार्वजनिक गरेको हो ।
यस्तो छ घटना विवरण
छिमेकी प्रकाश ऐरले मृतक घनश्याम खातीलाई १५ वर्ष पहिला बोक्सीको आरोप लगाएको विषयमा उनिहरुविच विगत लामो समय देखी एक आपसमा विवाद थियो ।
सोही कारण ऐरले खातीलाई मार्न योजनाबद्ध तरिकाले कृष्णपुर नगरपालिका–२ का भर्रा भन्ने रबी रानालाई नगद ४ लाख सुपारी दिएको जिल्ला प्रहरी कार्यालय कञ्चनपुरका प्रहरी नायव उपरिक्षक एवम् प्रवत्ता अमर बहादुर थापा क्षेत्रीले बताए ।
‘रबिले रातिको समयमा उनीहरुको घरमा गएर धारीलो हतियार प्रयोग गरी हत्या गरेको हो,’ डिएसपी थापाले भने ।
हत्या गर्नुपूर्व दिनेश र होरी रानाले खाती दम्पतीका छोरा राजेश लाई घर जान नदिएर आफु संगैँ लगेर रक्सी सेवन गराएर अप्रत्यक्ष रुपमा हत्या गर्न सहयोग गरेको डिएसपी थापाले बताए ।
उनले भने ‘दिनेश र होरीले अप्रत्यक्ष रुपमा हत्या गर्न सघाएको अनुसन्धानमा खुलेको छ ।’ उत्त घटना घटिसकेपछी मात्रै दिनेशले खाती दम्पतीका छोरा राजेशलाई मोटरसाइकलमा घर छोडेर आफु फिर्ता भएकोे प्रहरीले जनाएको छ ।
साउन १९ गते खाती दम्पत्तीका छोरा राजेशले दिएको किटानी जाहेरीका आधारमा हत्यामा संलग्न रहेका उनिहरुलाई प्रक्राउ गरिएको डिएसपी थापाले जनाकारी दिए ।
उनले भने ‘रविको घरमा लुकाएर राखिएको १ लाख ५० हजार नगद रुपैया पनि बरामद गरीएको छ ।’
उनिहरुबिरुद्ध ज्यान सम्बन्धी कसुरमा मुद्दा दर्ता गरी अदालतबाट म्याद थप अनुमति लिएर प्रहरी हिरासतमा राखी थप अनुसन्धान भइरहेको प्रहरीले जनाएको छ ।
