रुकुम । रुकुम पश्चिम प्रहरीले ठूलो मात्रामा अवैध लागुऔषध चरेस तथा ट्याब्लेटसहित ७ जनालाई पक्राउ गरेको छ। जिल्लाका विभिन्न ठाउँबाट प्रहरीले लागुऔषध चरेस र ट्याब्लेटसहित ७ जनालाई पक्राउ गरेको जानकारी दिएको छ।
जिल्ला प्रहरी कार्यालय रुकुम पश्चिमका प्रहरी नायव उपरीक्षक ठगबहादुर केसीकाअनुसार १४ किलो तीन ग्राम चरेससहित पाँचजना र लागुऔषध ट्याब्लेटसहित दुईजना पक्राउ परेका छन् ।
जिल्लाको आठविसकोट नगरपालिका १४ छेपारेबाट १३ किलो चरेससहित सोही नगरपालिका ११ का २८ वर्षीय बिमलकुमार शाही, बाँफिकोट गाउँपालिका ८ दुलीका २३ वर्षीय लक्ष्मण केसी र गाउँपालिका ५ काँडाका ३१ वर्षीय महेन्द्र केसी तथा सानीभेरी गाउँपालिका ४ गोलचौरका २८ वर्षीय बसन्त भन्ने बलबहादुर चन्द पक्राउ परेका हुन्।
यस्तै गत आइतबार जिल्लाको त्रिवेणी गाउँपालिका झुल्नेटाबाट एक किलो तीन सय ग्राम चरेससहित एकजनालाई पक्राउ गरेको डीएसपी केसीले जानकारी दिए ।
झुल्नेटाबाट रुकुम पूर्व पुथा उत्तरगंगा गाउँपालिका १० घुम्लिबाङका १९ वर्षीय सिलास बुढालाई पक्राउ गरेको उनले बताए । उक्त दिन सोही ठाउँबाट पाँच सय वटा लागुऔषध ट्याब्लेटसहित जिल्लाको मुसिकोट नगरपालिका ३ का विष्णु कसेरा र रुकुम पूर्व पुथा उत्तरगंगा गाउँपालिका १४ नाखाका १९ वर्षीय गायस पुनलाई पक्राउ गरिएको डीएसपी केसीले जानकारी दिए ।
जिल्लामा अवैध लागुऔषध नियन्त्रण गर्न प्रहरीले पछिल्लो सयम विशेष योजना बनाएर काम गर्दै आएको उनले बताए । जिल्लामा लागुऔषध कारोबार अत्याधिक हुने गरेकाले यसलाई न्युनिकरणका साथै कानुनी कारबाही गर्नका लागि प्रहरीले सक्रियता देखाएको छ ।
