भदौ २८ कञ्चनपुर । हाइड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनी (HIDCL) अर्थात एचआईडिसीएलको साढे ३ करोड कित्ताभन्दा बढी शेयर लिलाम बिक्रीमा आउने भएको छ। कम्पनीले निष्काशन गरेको हकप्रद शेयरमा आवेदन नपरेको सो शेयर लिलाम बिक्रीमा आउने भएको हो।
कम्पनीले जेठ २७ गतेसम्म कायम साविक शेयरधनीहरुका लागि १ बराबर १ अनुपातमा प्रतिकित्ता १०० अंकित मूल्यका ११ करोड कित्ता हकप्रद शेयर निष्काशन गरेको थियो। सोमध्ये १ लाख ९६ हजार ४२४ आवेदकबाट कुल ७ करोड ३७ लाख ७० हजार २७६ कित्ता शेयरका लागि आवेदन परेको थियो। जुन भदौ २६ गते बाँडफाँट गरिएको थियो। बाँडफाँट नभएको ३ करोड ६२ लाख २९ हजार ७२४ कित्ता शेयर कम्पनीले शिलबन्दी बोलपत्रमार्फत खरिद आव्हान गर्नेछ।
हकभन्दा बढी शेयर माग गरी दरखास्त दिने आवेदकहरुको बाँडफाँटमा नपरेको हकप्रद शेयर बापतको रकम भदौ ३१ गतेदेखि आईपीएस मार्फत सम्बन्धित आवेदकहरुको बैंक खातामा रकमान्तर गरिने व्यवस्था मिलाइएको छ।
कम्पनीको धितोपत्र निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ।
