महेन्द्रनगर । कोरोना संक्रमणलाई मध्यनजर गर्दै कञ्चनपुरमा पनि आजैबाट निषेधाज्ञा जारी हुने भएको छ । बिहीवार (आज) राति १२ बजेदेखि भदौ १४ गते राति १२ बजे सम्म जिल्लाभर लागु हुने गरी आशिंक निषेधाज्ञा जारी गरिएको प्रमुख जिल्ला अधिकारी नुरहरी खतिवडाले बताए । अत्यावश्यक सेवा तथा वस्तु बाहेकका अन्य सबै प्रकारका उद्योग, व्यापार व्यवसाय सञ्चालन गर्न नपाईने गरी संक्रामक रोग र स्थानीय प्रशासन ऐन अनुसार निषेधाज्ञा जारी गर्न लागिएको प्रमुख जिल्ला अधिकारी खतिवडाले जानकारी दिए ।
के गर्न पाइदैन ?
अतिआवश्यक काम बाहेक घर बाहिन निस्कन पाइने छैन । शैक्षिक सस्था, प्रशिक्षण केन्द्रहरु, ट्युसन सेन्टर, भाषा कक्षा सभा, सम्मेलन, गोष्ठी, तालिम, सेमिनार, डिपार्टमेन्ट स्टोर, मनोरञ्जन संचालन गर्न पाइने छैन । यस्तै सैलुन, ब्यूटीपार्लर, सिनेमा हल, पार्टी, प्यालेस, स्वीमीङ पुल, जिमखाना, पुस्तकालय, संग्रहालय पनि सञ्चालन गर्न पाइने छैन् ।
के गर्न पाइने छ ?
अत्यावश्यक कामका लागि मात्रै निजी तथा सार्वजनिक सवारी साधन जोर बिजोरका आधारमा सञ्चालन गर्न पाइने छ भने औषधि, खाद्यान्न, तरकारी, दुध, फलफूल, माछा, मासु लगायत अत्यावश्यक बस्तुहरु किन्न तथा अतिआवश्यक कामका लागि मात्रै घर बाहिर हिडडुल गर्न पाइने छ । यस्तै बैंकिङ सेवा भर्चुअल वा विद्युतीय माध्यमबाट सेवा प्रवाह गर्ने यदि सम्भव नभए स्वास्थ्य सुरक्षाको मापदण्ड अनुसार न्यूनतम कर्मचारी उपस्थित गराई सेवा प्रवाह गर्न सकिने छ ।
बिहीबार मात्रै कञ्चनपुरमा १४ जनामा कोरोना पुष्टि भएको छ । यो संगैँ जिल्लामा कोरोना संक्रमितको संख्या ६ सय २२ पुगेको छ ।
