महेन्द्रनगर । लगातारको अविरल वर्षाका कारण कञ्चनपुरको बेलौरी नगरपालिका–२ बैजुडाडास्थित नेपाल–भारत सीमा स्तम्भ ढलेको छ ।
मंगलबार १२ बजेतिर बैजुडाडास्थित नेपाल–भारत २०७ नम्बर पिल्लर ढलेको बेलौरी बोर्डर आउट पोष्टका प्रमुख प्रहरी नायव उपरिक्षक गंगादत्त पन्तले बताए ।
उनकाअनुसार सीमास्तम्भ नजिकै उम्रिएको सिमलको रुखका कारण वर्षौदेखि सो स्तम्भ बांगिएको अवस्थामा थियो । बुधबार बिहानैदेखि परेको पानीका कारण स्तम्भ ढलेको छ ।
डिएसपी पन्तले भने ‘जिर्ण रहेको उत्त पिल्लर लगातार वर्षा हुदाँ ढलेको हो ।’ फिल्डमा देखिएको उत्त पिल्लर नापी विभागको रेकर्डमा भने नरहेको उनले बताए ।
ढलेको २०७ नम्बर पिल्लर मर्मतका लागि माथी रिपोर्ट गरिएको डिएसपी पन्तले बताए । उनले भने ‘सीमा पिल्लर मर्मत एक पक्षले मात्र गर्न पाउदैन,दुबै पक्षले गर्नु पर्छ । उनले थपे ‘त्यसका लागि हामीले माथी रिपोर्ट गरेका छौ । भारतिय पक्षलेपनि गर्यो होला ।’
लामो समयदेखि सीमास्तम्भ बाँगिएर जिर्ण हुँदासमेत सम्बन्धित निकायको वेवास्ताका कारण सीमास्तम्भ ढलेको स्थानियले बताए ।
उनिहरुकाअनुसार कञ्चनपुरको दक्षिणी क्षेत्रमा भारतीय पक्षले कैयौं स्थानमा सीमास्तम्भ गायव पार्ने र नक्कली स्तम्भ गाडेर सीमा अतिक्रमण गर्दै आएकोे छ ।
फोटो सौजन्यः पल्लब राज भट्ट
