कार्तिक ०२ महेन्द्रनगर । महाकाली नदीको बाढीमा फसेका भीमदत्त नगरपालिका–९ मसेट्टीका ५ जनाको सकुसल उद्धार
गरिएको छ । नेपाली सेनाको हेलिकप्टरले १८ घण्टापछि बाढीमा फसेकाको मंगलबार बेलुका उद्धार गरिएको जिल्ला प्रहरी कार्यालय कञ्चनपुरका एसपी उमाप्रसाद चतुर्बेदीले जानकारी दिए ।
अबिरल वर्षाले महाकाली नदीमा पानीको बहाब बढेपछि सोमबार नदी किनारमा कुखुरा खोर कुर्न गएका पुष्कर नायक, दीर्घमती खड्का, शान्ती नायक, असोक नायक र अजय नायक बाढीमा फसेका थिए ।
उनीहरुको उद्धारको लागि सुरक्षाकर्मीको टोली दिउँसो नै मसेट्टी पुगेपनि महाकालीमा पानीको बहाब बढि भएका कारण उद्धार गर्न सकेको थिएन । त्यस पछि उद्धारको लागि हेलिकप्टर ल्याइएको थियो । हेलिकप्टरको कठिन प्रयासपछि करिब १८ घण्टा पछि बाढीमा फसेकाको उद्धार गरिएको हो
