महाकालीको बहावले दोधारा–चाँदनी झोलुङ्गे पुलको पिलर ढल्यो, आवतजावत बन्द

कञ्चनपुर , १४ असोज

कञ्चनपुरको दोधारा–चाँदनी नगरपालिका र भीमदत्त नगरपालिका जोड्ने ऐतिहासिक झोलुङ्गे पुलको एउटा पिलर महाकाली नदीको तीव्र बहावले ढलेपछि पुलबाट हुने आवतजावत पूर्णरूपमा बन्द गरिएको छ ।

बुधबार बिहान दोधारा–चाँदनीतर्फको भागमा रहेको तेस्रो टावरको पिलर महाकाली नदीको बहावले ढालेपछि पुलमा आवतजावत रोकिएको हो । पिलरमा क्षति पुगेपछि पुलको संरचनामा थप जोखिम हुन सक्ने भन्दै सुरक्षाका दृष्टिले आवतजावत बन्द गरिएको हो ।

वि।सं। २०६१ सालमा निर्माण सम्पन्न भएको करिब १ हजार ४५२ दशमलव ९६ मिटर लामो यो झोलुङ्गे पुल एशियाकै दोस्रो लामो झोलुङ्गे पुलका रूपमा चिनिन्छ । पुल निर्माण भएपछि दोधारा–चाँदनीका स्थानीयलाई कञ्चनपुर सदरमुकाम महेन्द्रनगर आवतजावत गर्न भारतीय बाटो प्रयोग गर्नुपर्ने बाध्यता हटेको थियो ।

पुलमा क्षति पुगेपछि स्थानीयलाई पुनः लामो दूरी घुमेर आवतजावत गर्नुपर्ने अवस्था सिर्जना भएको छ । स्थानीयले पुललाई तत्काल मर्मत गरी सुरक्षित रूपमा सञ्चालनमा ल्याउन सरकारसँग माग गरेका छन् ।

स्थानीय गगनबहादुर सिंहले पुल दोधारा–चाँदनीका लागि दैनिक आवतजावतको महत्वपूर्ण माध्यम भएकाले छिटो मर्मत गर्नुपर्ने बताउनुभयो ।

दोधारा–चाँदनी नगरपालिकाका नगरप्रमुख किशोरकुमार लिम्बूले झोलुङ्गे पुल ऐतिहासिक सम्पदाका रूपमा समेत रहेको भन्दै पुलमा क्षति पुगेर आवतजावत बन्द हुँदा स्थानीयको दैनिक जीवनसँगै क्षेत्रको आर्थिक गतिविधिमा समेत प्रभाव पर्ने बताउनुभयो ।

पुलमा क्षति पुगेको जानकारी पाएलगत्तै कुनै दुर्घटना हुन नदिन आवतजावत पूर्णरूपमा बन्द गरिएको कञ्चनपुरका प्रमुख जिल्ला अधिकारी मदन कोइरालाले बताउनुभयो । उहाँका अनुसार यातायात पूर्वाधार निर्देशनालयको प्राविधिक टोलीसँग समन्वय भइसकेको छ । प्राविधिक टोलीले स्थलगत निरीक्षण गरी दिने प्रतिवेदनका आधारमा थप प्रक्रिया अघि बढाइनेछ ।

यसैबीच, पुलमा क्षति पुगेको जानकारी पाएपछि सुदूरपश्चिम प्रदेशका मुख्यमन्त्रीसहित प्रदेश सरकारका मन्त्रीहरूको टोलीले समेत क्षतिग्रस्त झोलुङ्गे पुलको स्थलगत निरीक्षण गरेको छ । टोलीले पुलको क्षतिको अवस्था, महाकाली नदीको बहाव तथा तत्काल गर्नुपर्ने मर्मतसम्भारका विषयमा जानकारी लिएको छ ।

पुलबाट आवतजावत प्रभावित भए पनि केही दूरीमा चारलेनको पक्की पुल निर्माण भइसकेकाले विगतमा जस्तो भारतीय बाटो प्रयोग गर्नुपर्ने बाध्यता भने छैन । तर ऐतिहासिक, पर्यटकीय तथा स्थानीय आवतजावतको महत्वपूर्ण माध्यमका रूपमा रहेको झोलुङ्गे पुललाई समयमै प्राविधिक अध्ययन गरी मर्मत वा पुनर्निर्माण गरेर सञ्चालनमा ल्याउनुपर्ने स्थानीयको माग छ ।

ताजा खबर

सुदूरपश्चिम विश्वविद्यालयमा राष्ट्रियस्तरको ह्याकाथन ‘इन्नेक्स २०२६’ सुरु

कञ्चनपुर, ५ मंसिर। सुदूरपश्चिम विश्वविद्यालयमा सूचना प्रविधि र नवप्रवर्तनको क्षेत्रमा...

भीमदत्त–७ मा ब्रह्मदेव राजमार्गको झाडी सफाइ, सडकमा सौर्यबत्ती जडान गरिने

कञ्चनपुर, ५ मंसिर । कञ्चनपुरको भीमदत्त नगरपालिका–७ स्थित ब्रह्मदेव राजमार्गअन्तर्गत...

उत्कृष्ट खेलाडीलाई मदन चन्दद्वारा ट्र्याकसुट वितरण

कञ्चनपुर, १५ कार्तिक  कञ्चनपुर को भीमदत्त नगरपालिका–७ हल्दुखालमा आयोजित खुला...

Website developed by:

spot_img

छुटाउनु भयो कि ?