कञ्चनपुर १२ भाद्र
सुदूरपश्चिम प्रदेश सरकार बजेट अभावको अवस्थामा रहेका बेला त्यसको प्रत्यक्ष असर कञ्चनपुरको महाकाली आयुर्वेदिक औषधालयमा समेत देखिन थालेको छ । बजेट अभावका कारण औषधालयमा आवश्यक आयुर्वेदिक औषधिको अभाव हुँदा उपचारका लागि पुग्ने सेवाग्राही प्रभावित भएका छन् ।
औषधालयमा दैनिकजसो आयुर्वेदिक उपचारका लागि सेवाग्राही पुग्ने गरे पनि आवश्यक औषधि पर्याप्त मात्रामा उपलब्ध नहुँदा समस्या भएको औषधालयका प्रमुख डा. सूर्य उपाध्यायले बताए । उनका अनुसार चिकित्सकीय परामर्शपछि निःशुल्क उपलब्ध हुनुपर्ने कतिपय औषधि औषधालयमै नहुँदा बिरामीलाई बाहिरबाट खरिद गर्नुपर्ने अवस्था आएको छ ।
‘औषधालयमा आउने बिरामीलाई चिकित्सकीय परामर्श दिने गरेका छौँ । तर आवश्यक औषधि उपलब्ध नहुँदा कतिपय औषधि बाहिरबाटै खरिद गर्नुपर्ने अवस्था छ,’ डा. उपाध्यायले भने ।
आयुर्वेदिक उपचारप्रति सेवाग्राहीको आकर्षण बढ्दै गएको अवस्थामा सरकारी औषधालयमै औषधिको अभाव हुन थालेपछि सेवाग्राही थप समस्यामा परेका छन् । विशेषगरी आर्थिक रूपमा कमजोर नागरिकले सरकारी स्वास्थ्य संस्थाबाट निःशुल्क वा सहज रूपमा औषधि पाउने अपेक्षा गर्ने भए पनि औषधि अभावका कारण निजी क्षेत्रबाट औषधि किन्नुपर्ने बाध्यता सिर्जना भएको छ ।
प्रदेश सरकारको बजेट अभावका कारण औषधि खरिद तथा आपूर्तिमा समेत असर परेको औषधालयले जनाएको छ । नियमित उपचारका लागि आउने सेवाग्राहीलाई परामर्शसँगै आवश्यक औषधि उपलब्ध गराउन नसक्दा सरकारी स्वास्थ्य सेवाको प्रभावकारितामाथि समेत प्रश्न उठ्न थालेको छ ।
आयुर्वेदिक उपचार विस्तार र सेवाग्राहीको संख्या बढिरहेको अवस्थामा औषधिको नियमित आपूर्ति सुनिश्चित गर्न सम्बन्धित निकायले तत्काल पहल गर्नुपर्ने देखिएको छ । आर्थिक रूपमा कमजोर नागरिकका लागि सरकारी स्वास्थ्य संस्थामै औषधि अभाव हुनु थप चिन्ताको विषय बनेको छ।
