कञ्चनपुर २ असार
कञ्चनपुरको भीमदत्त नगरपालिका वडा नम्बर ९ का स्थानीय बासिन्दाले आफ्ना विभिन्न माग तत्काल सम्बोधन नभए आन्दोलनमा उत्रिने चेतावनी दिएका छन् ।
वडावासीहरुले जारी गरेको संयुक्त प्रेस वक्तव्यमा भीमदत्त नगरपालिकाका १९ वडामध्ये वडा नम्बर ९ भौगोलिक दृष्टिकोणले सबैभन्दा ठूलो वडा भए पनि आधारभूत प्रशासनिक तथा पूर्वाधारका समस्याबाट नागरिकहरु प्रभावित भइरहेको उल्लेख गरिएको छ ।
वक्तव्यमा वडा कार्यालयमा स्थायी सचिव नहुँदा सामान्य प्रशासनिक कामका लागि समेत नागरिकले ३ देखि ४ दिनसम्म धाउनुपर्ने बाध्यता रहेको जनाइएको छ । साथै ब्रह्मदेव बजारदेखि टुँडिखेल–खल्ला–मझेडी हुँदै महाकालीतर्फ जाने सडक खण्ड अवरुद्ध रहँदा स्थानीयको दैनिक जनजीवन प्रभावित भएको भन्दै पटक–पटक सम्बन्धित निकायलाई जानकारी गराउँदा पनि बेवास्ता गरिएको आरोप लगाइएको छ ।
स्थानीयहरुले यी समस्याप्रति सम्बन्धित निकाय गम्भीर नभएको भन्दै ७ दिनभित्र माग सम्बोधन गर्न अल्टिमेटम दिएका छन् । तोकिएको समयभित्र माग पूरा नभए चरणबद्ध आन्दोलनका कार्यक्रम सार्वजनिक गरिने चेतावनी समेत दिइएको छ ।
आन्दोलनका कार्यक्रम अन्तर्गत वडा कार्यालयमा प्लेकार्डसहित शान्तिपूर्ण प्रदर्शन, क्षेत्र नम्बर ३ का जनप्रतिनिधि तथा प्रदेशसभा सदस्यहरुको फोटोसहित सडक प्रदर्शन तथा वडा कार्यालयमा तालाबन्दी गर्ने कार्यक्रम रहेको वक्तव्यमा उल्लेख छ ।
स्थानीय अगुवाहरु र विभिन्न व्यक्तिहरुको हस्ताक्षरसहित जारी गरिएको वक्तव्यमा आफूहरुको जायज माग तत्काल सम्बोधन गर्न सम्बन्धित निकायसँग आग्रह गरिएको छ । माग सम्बोधन नभए थप सशक्त आन्दोलनका कार्यक्रम घोषणा गरिने चेतावनी समेत दिइएको छ ।
