कञ्चनपुर, १२ असोज
रसुवा जिल्लाको भोटेकोसीमा आएको बाढीमा परी सम्पर्कविहीन भएका भीमदत्त नगरपालिका–१०, तिल्केनीका ३२ वर्षिय प्रेम प्रसाद जोशीको ३४ दिनपछि हिन्दु परम्परा अनुसार कुशको शव बनाएर अन्तिम संस्कार गरिएको छ । रोल…
२१६ मेगावाट क्षमताको माथिल्लो त्रिशूली–ए जलविद्युत् आयोजनामा इलेक्ट्रिसियनका रूपमा कार्यरत भमिदत्त १० कञ्चनपुरका ३२ वर्षिय प्रेम प्रसाद जोशी बाढीका क्रममा बेपत्ता भएका थिए । लामो समयसम्म खोजी गर्दा पनि उनको अवस्था पत्ता लाग्न नसकेपछि परिवारले अन्ततः मन भारी पार्दै कुशको शव बनाएर सोमवार अन्तिम संस्कार गरेको हो । ३४ दिनसम्म परिवारले जोशी फर्किने आशा मारेको थिएन । हरेक दिन आउने खबरले कि त सास कि त लास बारे केही जानकारी मिल्ने आशा जगाउँथ्यो । तर, समय बित्दै गयो, प्रतीक्षा लम्बिँदै गयो । अन्ततः उनको अवस्था अज्ञात रहेकै अवस्थामा परिवारले अन्तिम संस्कार गर्ने कठोर निर्णय लिनुर्पयो ।
जोशीको परिवारमा सबैभन्दा ठूलो पीडा १३ महिनाको छोराको भविष्यसँग जोडिएको छ । बोल्न सिक्दै गरेको त्यो अबोध बालकले अझै ‘बुबा’ भनेर बोलाउन नपाउँदै बाढीले बुवाकोे साथ खोसेको छ । बुवाको माया, काख र साथको अर्थ बुझ्न नपाउँदै एक नावालकले जीवनभरका लागि अभिभावक गुमाउनु परेको छ ।
एकातिर श्रीमान फर्किने आशामा बसेकी श्रीमती, अर्कोतिर बुवाको अनुहार समेत चिन्न नपाएको अवोध वालक, परिवारको यो पीडा शब्दमा व्यक्त गर्न कठिन छ । बाढीले एउटा जीवन मात्र होइन, एउटा परिवारको सपना, भरोसा र भविष्य समेत उजाड बनाएको छ ।
जोशीको अन्तिम संस्कारका क्रममा परिवार, आफन्त, इष्टमित्र तथा छरछिमेकीले दिवंगत जोशीप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेका छन् ।
भोटेकोसीमा आएको बाढीले जोशीको परिवारमा मात्र होइन, कञ्चनपुरका अन्य परिवारमा पनि गहिरो पीडा छाडेको छ । उक्त बाढीमा परी जोशीसहित कञ्चनपुरका २६ जनाको अवस्था अझै अज्ञात रहेको छ ।
भावपूर्ण श्रद्धाञ्जली प्रेमप्रसाद जोशी !! शोकसन्तप्त परिवारमा हार्दिक समवेदना !!
