रसुवा १० भाद्र
तिब्बततर्फको हिमाली क्षेत्रमा परेको भारी वर्षापछि भोटेकोशी नदीमा आएको आकस्मिक बाढीले रसुवाको सीमावर्ती क्षेत्रमा ठूलो क्षति पुर्याएको छ। मंगलबार बिहान एक्कासि नदीको बहाव बढेपछि टिमुरे, रसुवागढी र आसपासका क्षेत्रमा जनजीवन प्रभावित भएको हो।
प्रारम्भिक विवरणअनुसार बाढीको प्रभाव नेपालतर्फ मात्रै सीमित रहेन। तिब्बतको केरुङ (जिलुङ) क्षेत्रमा समेत भारी वर्षा, पहिरो र बाढीका कारण सडक तथा संरचनामा क्षति पुगेको चिनियाँ सञ्चारमाध्यमले जनाएका छन्। केरुङ नाका आसपासका सडकमा पहिरो खसेपछि आवागमन प्रभावित भएको र केही संरचनामा समेत क्षति पुगेको बताइएको छ।
रसुवातर्फ भने भोटेकोशीमा पानीको सतह असामान्य रूपमा बढेपछि नदी किनारका बस्ती, सडक, पुल तथा अन्य संरचना जोखिममा परेका छन्। बाढीको बहाव निकै तीव्र रहेकाले नदी आसपासका बासिन्दालाई सतर्क रहन आग्रह गरिएको छ।
भोटेकोशी नदी तिब्बतको केरुङ आसपासको हिमाली क्षेत्र हुँदै नेपाल प्रवेश गर्छ। तिब्बततर्फको ल्हेन्दे खोला प्रणालीसँग जोडिएको यस नदीमा माथिल्लो क्षेत्रमा परेको भारी वर्षापछि पानीको बहाव अचानक बढेको प्रारम्भिक अनुमान छ। यद्यपि बाढीको वास्तविक कारण हिमताल फुटेको हो वा अत्यधिक वर्षाका कारण आएको आकस्मिक बाढी हो भन्ने विषयमा अझै यकिन भइसकेको छैन।
यसैबीच, तिब्बतको केरुङ क्षेत्रबाट खिचिएका पहिरो तथा बाढीका दृश्य सामाजिक सञ्जाल र चिनियाँ सञ्चारमाध्यममा सार्वजनिक भएका छन्। ती दृश्यमा सडकमा पहिरो झरेको, नदीको बहाव बढेको तथा आसपासका क्षेत्रमा क्षति पुगेको देखिन्छ।
बाढीपछि नेपाल–चीन सीमावर्ती क्षेत्रमा उद्धार, क्षतिको मूल्यांकन तथा सडक सञ्चालनका लागि सम्बन्धित निकाय सक्रिय भएका छन्। घटनाको थप विवरण संकलन भइरहेको छ।:
