कञ्चनपुर १३ जेठ
नेपालको झापा जिल्ला निवासी साहसी युवती यमुना ढकालले १०७ दिनमा करिब ५ हजार किलोमिटर लामो साइकल यात्रा पूरा गर्दै भारतका विभिन्न धार्मिक, ऐतिहासिक तथा पर्यटकीय क्षेत्रहरूको भ्रमण सम्पन्न गरेकी छन । वातावरण संरक्षणको सन्देशलाई जनमानसमा फैलाउने उद्देश्यका साथ सुरु गरिएको उनको यात्रा सफलतापूर्वक पूरा भई नेपालको पश्चिमी नाका कञ्चनपुरको गड्डाचौकी हुँदै स्वदेश प्रवेश गरेकी हुन ।
ढकालले आफ्नो यात्राको क्रममा भारतका विभिन्न महत्वपूर्ण धार्मिक तथा पर्यटकीय गन्तव्यहरू पार गरेकी थिइन । उनले नेपालबाट यात्रा सुरु गर्दै भारतको अयोध्या, मथुरा, वृन्दावन, दिल्ली, पञ्जाब, अमृतसर, वाघा बोर्डर, बद्रीनाथ, केदारनाथ, हरिद्वार, नजीबाबाद, धामपुर, मुरादाबाद, बरेली हुँदै बनबसा पुगेर यात्रा सम्पन्न गर्नु भएको थियो । १०७ दिनसम्मको एकल साइकल यात्रामा उनले हजारौँ किलोमिटर दूरी पार गर्दै वातावरण संरक्षण र हरियाली प्रवद्र्धनको सन्देश बोकेर भारतका विभिन्न स्थानमा आफ्नो अभियानलाई निरन्तरता दिएकी थिइन ।
भारत भ्रमणको अन्तिम चरणमा उनले पीलीभीतमा वृक्षारोपण कार्यक्रम सम्पन्न गरेपछि नेपाल फर्किएकी हुन्। । स्वदेश फर्किए लगत्तै उनले नेपालको पश्चिमी प्रवेशद्वारको रूपमा परिचित कञ्चनपुरको दोधारा चाँदनी नगरपालिकामा पनि बुधवार वृक्षारोपण कार्यक्रम आयोजना गरी आफ्नो अभियानलाई निरन्तरता दिएकी छन्। ।
ढकालले दोधारा चाँदनी नगरपालिकाका नगर प्रमुख किशोर कुमार लिम्वुले साइकल यात्री यमुना ढकाललाई स्वागत गर्दै एक नेपाली चेलीले एक्लै साइकल मार्फत भारतका विभिन्न शहरहरूको लामो यात्रा गर्नु आफैँमा साहसिक र प्रेरणादायी कार्य भएको बताउनु भएको छ । उनले यस्ता गतिविधिले युवा पुस्तालाई नयाँ ऊर्जा र प्रेरणा दिने उलल्लेख गर्दै ढकालको साहसिक कदमले नेपाललाई अन्तर्राष्ट्रिय स्तरमा चिनाउन मद्दत पुगेको समेत बताएका छन भने आगामी दिनमा पनि यस्ता अभियानहरू निरन्तर अघि बढाउन शुभकामना व्यक्त गरेका छन ।
यात्राका क्रममा वातावरण संरक्षण, वृक्षारोपण र हरियाली विस्तारको सन्देश बोकेर अघि बढेकी ढकालले आफ्नो यात्रालाई केवल भ्रमणमा सीमित नराखी सामाजिक चेतना फैलाउने अभियानका रूपमा अघि बढाएकी थिइन्। । विभिन्न स्थानमा स्थानीय समुदायसँग भेटघाट, संवाद तथा वृक्षारोपण कार्यक्रममार्फत उनले वातावरणीय संरक्षणको आवश्यकता र महत्त्वबारे जनचेतना फैलाउने प्रयास गरेकी थिइन्।
साइकल यात्राको अनुभव सुनाउँदै ढकालले सबैको साथ, सहयोग र हौसलाका कारण आफूले कठिन देखिएको यात्रा सहज रूपमा पूरा गर्न सफल भएको बताइन्। । यात्रा अवधिभर विभिन्न स्थानका स्थानीय नागरिक, सामाजिक व्यक्तित्व तथा शुभेच्छुकहरूको सहयोगले आफूलाई थप ऊर्जा दिएको वताउदै आगामी दिनमा पनि आफ्नो साइकल यात्रालाई अन्य देशहरूमा समेत विस्तार गर्दै वातावरण संरक्षण र हरियाली अभियानलाई अझ व्यापक बनाउने योजना रहेको बताएकी छन्। । वातावरण जोगाउने साझा अभियानमा सबैको सहभागिता आवश्यक रहेको उल्लेख गर्दै उनले वृक्षारोपणलाई केवल कार्यक्रमका रूपमा नभई दिगो जिम्मेवारीका रूपमा लिन आग्रह गरेकी छन्। ।
यमुना ढकालको यो साहसिक साइकल यात्रा केवल व्यक्तिगत उपलब्धि मात्र नभई वातावरण संरक्षण, महिला सशक्तीकरण र समाजमा सकारात्मक सन्देश प्रवाह गर्ने प्रेरणादायी अभियानका रूपमा हेरिएको छ । उनको यात्राले युवा पुस्तालाई नयाँ सोच, साहस र समाजप्रतिको जिम्मेवारीबोधको सन्देश दिएको स्थानीयले बताएका छन्।
