कञ्चनपुर १८ वैसाख
कञ्चनपुरमा एक बालकमाथि अमानवीय व्यवहार गरेको आरोपमा प्रहरीले एक व्यक्तिलाई नियन्त्रणमा लिएको छ। पक्राउ पर्ने व्यक्ति वेदकोट नगरपालिका–५ का ३७ वर्षीय भोज नाथ रहेको जिल्ला प्रहरी कार्यालयका प्रवक्ता डीएसपी हेमबहादुर शाहीले जानकारी दिएका छन्।
प्रहरीका अनुसार वेदकोट–५ कै ११ वर्षीय बालकमाथि हातखुट्टा बाँधेर कुटपिट गरिएको भिडियो सामाजिक सञ्जालमा सार्वजनिक भएपछि घटनाको अनुसन्धान सुरु गरिएको थियो। सोही आधारमा नाथलाई पक्राउ गरिएको हो। उनीविरुद्ध ज्यान मार्ने उद्योगअन्तर्गत मुद्दा दर्ता गरी थप अनुसन्धान अघि बढाइएको प्रहरीले जनाएको छ।
घटनाको विवरणअनुसार बालक चौधर नदी पूर्वतर्फ रहेको नाथको तरकारी बारीमा हराएको क्रिकेट बल खोज्न पुगेका थिए। त्यस क्रममा खरभुजा चोरी गरेको आरोप लगाउँदै नाथले बालकमाथि कुटपिट गरेका थिए। कुटाइका कारण बालकको टाउकोमा चोट लागी तीन वटा टाँका लगाउनुपरेको प्रहरीले जनाएको छ।
सामाजिक सञ्जालमा सार्वजनिक भएको भिडियोमा बालकका हातखुट्टा बाँधेर थप यातना दिएको दृश्य देखिएको छ। पीडित बालकका अभिभावक रोजगारीका लागि भारतमा रहेका छन् भने उनी वेदकोटमै आफ्नी हजुरआमासँग बस्दै आएका थिए।
