जल तथा मौसम विज्ञान विभागको केन्द्रीय कार्यालय बाट खटिएका मौसमविदको टोलीले कञ्चनपुरको दोधारा चाँदनीमा भएको ‘रेकर्ड ब्रेक’ वर्षाको स्थलगत अध्ययन गरेको छ ।
वरिष्ठ मौसमविद् डा इन्दिरा कँडेलको नेतृत्वको टोलीले बिहीबार दोधारा चाँदनीस्थित वर्षा मापन केन्द्रमा पुगेर स्थलगत अध्ययन गरेको हो । टोलीले वर्षा मापन केन्द्र र त्यहाँ राखिएका उपकरण ठीक अवस्थामा भए नभएको जाँच गरेको हो । यसका साथै दोधारा चाँदनी नगरपालिकाका कर्मचारी, जनप्रतिनिधि र स्थानीयसँग छलफल समेत गरिएको वताउदै मौसमविद् डा इन्दिरा कँडेलले “असार २३ र २४ गतेका दिन २४ घण्टाको अवधिमा अहिलेसम्मकै सर्वाधिक ६ सय २४ मिलीमिटर वर्षा रेकर्ड भएकाले थप अध्ययनका लागि स्थलगत अध्ययनका लागि आएको बताउनु भयो ।
दोधारास्थित वर्षा मापन केन्द्रका उपकरणको जाँच गरिएको र त्यसको नतिजा आउन केही समय लाग्ने उनको भनाइ छ । टोलीले आज कञ्चनपुरको हनुमाननगर र सुन्दरपुर केन्द्रमा रहेको वर्षा मापन केन्द्रको पनि अध्ययन गर्ने कार्यक्रम छ ।
