साउन ३१, काठमाडौं । विद्रोही संगठन तालिवानले अफगानिस्तानको राजधानी काबुलसहित धेरैजसो प्रमुख शहरहरु कब्जा गरेपछि अफगानी राष्ट्रपति असरफ घानी देश छाडेर भागेका छन् । विद्रोही संगठन तालिवानले धम्की दिएपछि उनले देश छाडेको अफगानी अधिकारीलाई उधृत गर्दै अन्र्तराष्ट्रिय सञ्चार माध्यमहरुले जनाएका छन् । घानीले राष्ट्रपतिबाट राजीनामा दिएर भागेको बताइएको छ । राष्ट्रपति घानीसंगै उपराष्ट्रपति अमरुल्लाह सलेहले पनि देश छाडेका छन् ।
उनीहरु भागेर ताजकिस्तान तर्फ गएको हुन सक्ने सञ्चार माध्यमहरुको दाबी छ । पछिल्लो एक सातामै अफगानिस्तानका धेरै शहरमाथि विद्रोही संगठन तालिवानले आफ्नो नियन्त्रणमा लिएको छ । अमेरिकी सेनाले अफगानिस्तान छाडेको करिब डेड महिना मै विद्रोही संगठन तालिवानले सत्ता कब्जा गरेको हो । यसैबीच अफगानिस्तानबाट विभिन्न देशहरुले आफ्ना नागरिकहरुको रेस्क्युलाई तीब्रता दिएकाछन् । नेपालले पनि त्यहाँ रहेका सबै नेपाली नागरिकलाई सम्पर्कमा आउन भनेको छ ।
