महेन्द्रनगर १६ असार । कञ्चनपुरको वेदकोट नगरपालिकाले निर्माण गरेको कोभिड अस्पताललाई निड्स नेपालले सहयोग गरेको छ । कोभिड १९ को दोस्रो लहर प्रतिकार्य परियोजना अन्र्तगत निड्सले स्वास्थ्य सामाग्री नगरपालिकाका लाई हस्तान्तरण गरेको हो । बुधबार निड्स नेपालकी अध्यक्ष अञ्जु जोशी भट्ट, कार्यकारी निर्देशक भवराज रेग्मीले नगर प्रमुख अशोक कुमार चन्दलाई स्वास्थ्य सामाग्री हस्तान्तरण गरेका हुन ।
निड्सका कार्यक्रम फोकल पर्सन विनोद कडाराले कारितास नेपालसँगको सहयकार्यमा अस्पताललाई स्वास्थ्य सामाग्री सहयोग गरिएको बताए । उनका अनुसार नगरपालिकाले तयार गरेको १५ शैयाको कोरोना अस्पतालमा उपचारलाई सहज बनाउन सहयोग गरिएको हो । निड्सले नगरपालिकाको कोभिड अस्पताललाई २ लाख ५० हजार बढी मुल्य बराबरको स्वास्थ्य सामाग्री सहयोग गरेको छ ।
निडसले कोभिड अस्पतालाई वेड, टेन्ट, कम्बल, एन–९५ मास्क, स्यानिटाईजर, सर्जिक ग्लोबस, पल्स अक्सीमिटर, नेबुलाईजर मेसिन लगायतका स्वास्थ्य सामाग्री सहयोग गरेको छ । सामाग्री हस्तान्तरणपछि नगर प्रमुख चन्दले निड्सलाई धन्यवाद दिए । साथै उनले स्वास्थ्य सामाग्री अस्पताललाई सञ्चालनमा सहयोग पुग्ने बताए ।
