कञ्चनपुर । कञ्चनपुरको शुक्लाफाँटा नगरपालिकास्थित शुक्लाफाँटाडिभिजन वन कार्यालयमा तालाबन्दी गरिएको छ ।
काठ दाउराको बिक्री वितरण फुकुवाको माग गर्दै आइतबार विभिन्न सामुदायिक वनका पदाधिकारीहरूले वन क्षेत्रमा गरिएको प्रतिबन्ध फुकुवाको माग गर्दै तालाबन्दी गरेका हुन् ।
यसैबीच, कृष्णपुर सामुदायिक वनका अध्यक्ष दान बहादुर बोहरा र वैजनाथ सामुदायिक वनका अध्यक्ष बहादुर सिंह महराद्वारा हस्ताक्षरित विज्ञप्तिमा प्रतिबन्ध फुकुवा नभएसम्म अनिश्चितकालिन तालाबन्दी गरिएको उल्लेख छ ।
नेपाल सरकार मन्त्री परिषद्को २०७७ जेठ १५ गतेको निर्णयले देशभरका वैज्ञानिक वन व्यवस्थापन कार्य योजना लागु भएका र वैज्ञानिक वन व्यवस्थापन लागु नभएका लगायत सम्पूर्ण वन क्षेत्रमा अन्याय पूर्ण तरिकाले काठ दाउरा सङ्कलन, ओसारपोसार र बिक्री वितरण गर्न पूर्ण रुपमा प्रतिबन्ध लगाएको थियो ।
उक्त निर्णयको विरोध भएपछि जेठ २८ गते साल बाहेकका अन्य काठमा लगाइएको प्रतिबन्ध खुला गरिएको थियो । तर सालमा लगाइएको प्रतिबन्ध नखुल्दा विभिन्न वन क्षेत्रका घाटगद्दीमा सङ्कलन गरिएको सालको काठ सडेर नोक्सान भइरहेको छ ।
