महेन्द्रनगर । सुदूरपश्चिम प्रदेशमा ४ महिनामा मात्रै लागुऔषध सहित ६५ जना प्रकाउ परेका छन् । चालु आर्थिक वर्ष २०७७/०७८ को साउँन देखी कार्तिक १७ गते सम्मको अवधिमा मात्रै प्रदेशबाट ६५ जना लागुऔषध सहित प्रकाउ परेका सुदूरपश्चिम प्रदेश प्रहरीले जनाएको छ ।
प्रदेशका विभिन्न जिल्ला तथा स्थानबाट लागुऔषध बेचविखन,ओसारपसार तथा सेवन गर्दै गरेको अवस्थामा चार महिनामा ६५ जनालाई प्रकाउ गरिएको सुदूरपश्चिम प्रदेश प्रहरी कार्यालयका प्रवत्ता एवम् प्रहरी वरिष्ठ उपरिक्षक मुकेश सिंहले बताए ।
उनकाअनुसार गत अर्थिक वर्ष ०७६/०७७ मा प्रदेशबाट २ सय ४५ जना प्रकाउ परेका थिए । ‘चालु आर्थिक वर्षको कार्तिक १७ गते सम्मको अवधिमा प्रदेशका विभिन्न स्थानबाट प्रहरीले २५ किलोग्राम गाँजा,३ सय ४७ ग्राम चरेश,४ सय ७२ ग्राम हेरोईन,१ हजार ९ सय ७६ मि.ग्राम हेरोईन, १ हजार १ सय १५ नाईट्राभेट ट्याबलेट,८७ स्पास्मो लगाएतका लागुऔषध सहित ५९ जना पुरुष, २ जना महिला,र ३ जना भारतिय नागरिक गरी जम्मा ६५ जना प्रकाउ परेका छन् ।’ एसएसपी सिंहले भने ‘सबै भन्दा बढी कञ्चनपुरबाट प्रकाउ परेका छन् ।’
कञ्चनपुरबाट ३ जना भारतिय नागरिक सहित,४० जना पुरुष, एक महिला गरी ४४ जना, कैलालीबाट १६ जना पुरुष प्रकाउ गरिएको एसएसपी सिंहले बताए । यस्तै बझाङबाट २ जना पुरुष, बैतडीबाट २ जना पुरुष,दार्चुलाबाट २ जना पुरुष र अछामबाट एक जना पुरुष प्रकाउ गरिएको छ । डोटी,डडेल्धुरा र बैतडीबाट भने लागुऔषध सहित चालुआर्थिक वर्षको हाल सम्म एक जना पनि प्रकाउ परेका छैनन् ।
एसएसपी सिंहका अनुसार प्रकाउ पर्नेमा २० देखी ४५ वर्ष उमेर समुहका मानिस बढी रहेका छन् । सामाजिक सञ्जालको दुरुपयोग, बेरोजगारी लगाएका कारणले लागुऔषध प्रयोगकर्ता तथा बेचविखन गर्ने बढीहरेका एसएसपी सिंहले बताए ।
‘सामाजिक सञ्जालको दुरुपयोग,बेरोजगारी, अभिभावकले आफ्ना बच्चाको ख्याल नगर्दा पछिल्लो समय युवायुवती लागुऔषधमा फस्ने गरेका छन् ।’ एसएसपी सिंहले भने ‘ अभिभावकले कम्तिमा पनि आफ्ना बच्चा के गरिरहको छ, को संग संगत गरिरहेको छ भन्ने कुरामा ध्यान दिन जरुरी छ ।’
प्रहरीले यसको न्यूनिकरणका लागि निरन्तर जनचेतनामुलक कार्यक्रम गर्ने गरेको छ । यद्यपी यसको पूर्ण न्यूनिकरणका लागि अभिभावक,साथीभाई,शिक्षक,समाजसेवी,पत्रकार सबैले आ–आफ्नो क्षेत्रबाट खट्नु पर्ने एसएसपी सिंहले बताए ।
