महेन्द्रनगर । सुदूरपश्चिम प्रदेशमा बाढी पहिरोका कारण बुधबार मात्रै १० जनाको मृत्यु र ११ जना वेपत्ता भएका छन् ।
प्रदेश प्रहरी कार्यालयका प्रहरी बरिष्ठ उपरिक्षक मुकेश सिंहका अनुसार बाढी पहिरोका कारण एकैदिन अछाममा ६ जनाको मृत्यु र ११ जना बेपत्ता भएका छन् ।
त्यस्तै बझाङ र बाजुरामा २/२ जनाको मृत्यु भएको छ ।
अछाममा ६ जनाको शव फेला, ११ जना अझै सम्पर्कविहिन
अछाममा अत्याधिक वर्षापछि आएको बाढीले बगाउँदा (यो समाचार तयार पार्दा सम्म) ६ जनाको मृत्यु भएको छ भने ११ जना वेपत्ता भएका छन् ।
जिल्लाको रामारोशन गाउँपालिका– ५ सैनिबजार स्थित कैलाश खोलामा गएराती आएको बाढीले बगाउँदा सैनिबजारका १३ वर्षिया नविन साउँद, ३३ वर्षिया गौरी शाह, ४८ वर्षिय चन्द्र साउँद सहित ६ जनाको शव फेला परेको जिल्ला प्रहरी कार्यालय अछामका प्रहरी निरीक्षक एवम् प्रवक्ता रमेश अवस्थिले बताए ।
‘बाढीले बगाएका १७ जना मध्ये ६ जनाको शव फेला परेको छ,बाकीँ ११ जना वेपत्ता भएका छन् ।’ प्रहरी निरीक्षक अवस्थिले भने ‘ फेला परेका ६ जनाको शव मध्ये ३ जनाको मात्र सनाखत भएको छ बाकीँ को सनाखत हुन सकेको छैन ।’ हाल हराएकाहरुको खोजी कार्य भइरहेको प्रहरी निरीक्षक अवस्थिले जानकारी दिए ।
उनकाअनुसार प्रमुख जिल्ला अधिकारी गोकर्ण उपाध्याय सहितको जिल्लाका उच्च अधिकारीहरुको टोली पनि सेनाको हेलिकप्टर मार्फत घटनास्थल पुगेको छ ।
उक्त बाढीले सैनीबजार स्थित २२ घर तथा पसल पनि बगाएको छ । स्थानिय नविन शाहका अनुसार बाढीले खालबजार, मुजाबगर, सैनीबजार, गजड, अल्लेडीलगायत धेरै ठाउँमा क्षति पु¥याएको छ । कैलाश खोलाको बाढीले खोला छेउछाउका घर, पसल र खेत समेत बगाएको बताइएको छ ।
बझाङमा २ जनाको मृत्यु
बुधबारनै बझाङको बुंगल नगरपालिका–५मा पनि पहिरोले पुरिएर २ जनाको मृत्यु भएको छ ।
मृत्यु हुनेमा १२ वर्षीय सचिन ताम्राकार र ५ वर्षीय सुदीप ओखेडा रहेका सुदूरपश्चिम प्रदेश प्रहरी कार्यालयका प्रहरी बरिष्ठ उपरिक्षक एवम् प्रवक्ता मुकेश सिंहले बताए ।
पहिरोले स्थानीय पिपला ताम्राकारको घर बगाउँदा सचिन र सुदिपको मृत्यु भएको हो । ४० वर्षिया पिपला, १८ वर्षिया सुनीता ताम्राकार र १२ वर्षिया सन्तोषी ताम्राकार र १६ वर्षिय अनिल ताम्राकार घाइते भएका एसएसपी सिंहले जानकारी दिए ।
घाइते चारै जनाको स्थानीय स्वास्थ्य चौकीमा उपचार भइरहेको छ ।
बाजुरामा २ जनाको मृत्यु
बाजुरामा पनि बाढी पहिरोमा परेर २ जनाको मृत्यु भएको छ । जिल्लाको खप्तड छेडेदह गाउँपालिका– १ का मीनबहादुर बुढाको घर पहिरोले बगाउँदा ३ वर्षिया सुमिका बुढाको मृत्यु भएको एसएसपी एवम् प्रवत्ता सिंहले बताए ।
उनकाअनुसार पहिरोले ५ वर्षिया विनीता, ६५ वर्षिय नन्दादेवी बुढा घाइते भएका छन् । त्यस्तै बाजुराकै धूपे खोलामा आएको बाढीमा बगेर ७५ धिनु लुहारको पनि मृत्यु भएको एसएसपी सिंहले जनाकारी दिए ।
