महेन्द्रनगर । सुदूरपश्चिममा कोरोना संक्रमितको संख्या ४ सय ६६ पुगेको छ ।
राष्ट्रिय जनस्वास्थ्य प्रयोगशाला टेकुमा गरिएको परीक्षणमा विहिवार डडेल्धुराका ८३, अछाममा २९ र बैतडीमा २५ जनामा गरी जम्मा १ सय ३७ जनामा कोरोना संक्रमण पुष्टि भएको हो ।
स्वास्थ्य कार्यालय डडेल्धुराका कोभिड–१९ फोकल पर्सन हरि भट्टका अनुसार जिल्लामा थप ८३ जनामा संक्रमण पुष्टि भएको छ ।
त्यस्तै अछामको मेल्लेख गाउँपालिकामा २३ जना र सांफेबगर नगरपालिकामा ६ जनामा संक्रमण पुष्टि भएको स्वास्थ्य कार्यालय अछामका प्रमुख झनक ढुंगानाले बताए ।
उता स्वास्थ्य कार्यालय बैतडीका कोभिड–१९ फोकल पर्सन भुवन प्रसाद जोशीले पनि जिल्लामा २५ जना नयाँ संक्रमित थपिएको जानकारी दिए ।
अहिले उनिहरु स्वास्थ्यकर्मीको सम्पर्कमा रहेका र उनिहरुको स्वास्थ्य अवस्था सामान्य रहेको बताइएको छ ।
कैलालीको सेती प्रादेशिक अस्पतालको प्रयोगशालामा नमूनाको चाप बढे पछि केही दिन अगाडि दुई हजार नमूना काठमाडौँ पठाइएको थियो ।
बिहिवार संक्रमण पुष्टि हुनेहरु सबैको परीक्षण काठमाडौँमा नै गरिएको हो ।
