काठमाडौं । प्रधानमन्त्री केपी शर्मा ओलीले लकडाउनको नीतिले नेपालमा कोरोना भाइरसको संक्रमण फैलिन नपाएको दावी गरेका छन् । प्रतिनिधिसभा बैठकलाई सम्बोधन गर्दै प्रधानमन्त्री ओलीले लकडाउनको नीतिले क्षति कम गरेको बताए ।
प्रधानमन्त्री ओलीले भने, ‘समयमै लकडाउनको नीति अवलम्वन गर्यौँ । मास्क लगाउने, सामाजिक दूरी कायम गर्ने, साबुन पानीले हात धुने, राम्रो खाने कुरा सरकारले गरेका प्रयास हुन् । मानिसमा संक्रमण फैलिन नपाउने र नमर्ने कुरा पनि उपलब्धि हुन् ।’
पहिलो स्वाब परीक्षणका लागि हङकङ पठाइएको स्मरण गर्दै प्रधानमन्त्री ओलीले अहिले विभिन्न २१ ठाउँमा स्वाब परीक्षण भइरहेको जानकारी दिए । उनले केही ठाउँमा व्यवस्थापनमा गम्भीर कमजोरी भएको बताए । उनले भने, ‘व्यस्थापनमा गम्भीर कमजोरी भएका छन् । एउटा मेसीन एकातिर, त्यसको पाटपुर्जा अर्कोतिर पनि भएको छ । ती दुईलाई जोड्न समय लागेको छ । यस्ता कमजोरी छन् ।’
बाँध फुटेजस्तैगरी कोरोना आएको भन्दै प्रधानमन्त्री ओलीले मापदण्डका आधारमा क्वारेन्टाइन व्यवस्थापन गर्न सम्भव नभएको बताएका छन् ।
कोरोना संक्रमण साउनमा पिकमा पुग्ने र कम हुँदै गएर कात्तिकमा समाप्त हुनसक्नेगरी अगाडि बढेको अनुमान गरिएको प्रधानमन्त्री ओलीको भनाइ छ । उनले भने, ‘विश्व बैंकको अनुमान अनुसार साउनको अन्तिमतिर पिकमा पुग्ने र कम हुँदै गएर कात्तिकमा समाप्त हुन सक्छ । त्यस्तो नहुँन पनि सक्छ ।’नागरिक खबर
