महेन्द्रनगर । पिसिआर रिपोर्ट नेगेटिभ भन्दै हिजो घर फिर्ता पठाएका कञ्चनपुरको पुनर्वास नगरपालिकाका एक युवकलाई आज कोरोना पोजेटिभ भन्दै आइसोलेसनमा भर्ना गरिएको छ ।
सोमबार नगरपालिकाले पिसिआर नेगेटिभ आएको भन्दै घर फिर्ता गरेको थियो । संक्रमितलाई मंगलबार बिहान फेरि घरबाट बोलाएर सेती अस्पतालको आइसोलेसनमा राखिएको छ ।
मोतीबस्ती का ३२ वर्षीय ती कोरोना संक्रमितका दाइले आफ्नो भाइलाई आज अस्पताल लगिएको बताए ।
‘हिजो नगरपालिकाले फोन गरेको तपाईको भाईको पिसिआर रिर्पोट नेगेटिभ आएको छ भनेर घर लैजान भन्यो’ उनले भने ‘आज फेरि तपाईँको रिर्पोट पोजेटिभ रहेछ भन्दैँ एम्बुलेन्समा लिएर गए ।’
संक्रमितका दाजुले आफ्नो परिवारका सदस्यको पिसिआर परीक्षण गर्न माग गरेका छन् । नगरपालिकाकी उपप्रमुख शारदा विष्ट शर्माले हिजो प्राविधिक कारणले गल्ती भएको बताइन् ।
