महेन्द्रनगर । नेपालको पश्चिमी नाका गड्डाचौकी हुदैँ भारतबाट दिनहुँ सयौँ नेपाली स्वदेश फर्किरहेका छन् ।
कोरोना भाइरस महामारीका कारण भारतमा रोजगारी गुमाएकाहरूको यो लर्को १४ दिनदेखि जारी छ ।
करिब दुई महिनासम्म बन्द यो नाका भारतमा अलपत्र परेका नेपाली नागरीकको उद्धारका लागी खुला गरिएपछि भारतबाट फर्कनेको भिड लाग्न थालेको हो ।
आज सोमबार विहान ४ घण्टामा मात्र ५ सय ७३ जना नेपाल प्रवेश गरेका छन् भने १ सय २७ जना मात्र भारत तर्फ पठाइएको छ ।
नाका खुला गरीएको जेठ १२ गतेयता मात्रै गड्डाचौकी नाका भएर २५ हजार ३ सय ४० जना भित्रिएको जिल्ला प्रशासन कार्यालय कञ्चनपुरले जनाएको छ ।
गड्डाचौकी नाका भएर १४ दिनमा २५ हजार ३ सय ४० जना भित्रिए र ३ हजार १ सय १८ जनालाई नेपालबाट भारत पठाइएको जिल्ला प्रशासन कार्यालय कञ्चनपुरका सहायक प्रमुख जिल्ला अधिकारी गोकर्ण प्रशाद उपाध्यायले बताए ।
सामान्य स्वास्थ्य परीक्षण गरी गन्तव्यमा पठाइदैँ,संक्रमणको जोखिम बढ्यो
भारतबाट फर्कनेहरूको सीमानाकामा सामान्य स्वास्थ्य चेकजाँच मात्र गरी उनिहरुलाई गन्तव्यमा पठाउने गरीएको सहायक प्रमुख जिल्ला अधिकारी उपाध्यायले बताए ।
स्थानीय तह र प्रदेश सरकारले व्यवस्थापन गरेका गाडीबाट नाकाबाटै उनीहरूलाई गन्तव्यमा पठाउने गरिएको छ ।
भारतबाट फर्केकाहरूको सामान्य स्वास्थ्य जाँचको भरमा सीधै गाउँ जाँदा कोरोना संक्रमण फैलने जोखिम पनि बढेको छ ।
प्रदेश स्वास्थ्य निर्देशक डा. गुणराज अवस्थीले उनीहरूलाई क्वारेन्टाइनमा सुरक्षित व्यवस्थापन गर्न नसके सुदूरपश्चिममा कोरोनाको महामारीले भयावह रूप लिन सक्ने चेतावनी दिए ।फाइल फोटो
