काठमाडौं–विश्वभर महामारीका रुपमा फैलिएको कोरोना भाइरसको संक्रमण २४ घण्टाको अवधिमा ७९ हजार ३ सय ३ जनामा फैलिएको छ । यो समयमा ५ हजार ९ सय ६७ जनाले ज्यान गुमाएका छन् ।
विश्वका २०४ देशमा फैलिएको यो महामारीबाट अहिलेसम्म ५२ हजार १ सय ५९ जनाले ज्यान गुमाएका छन् । १० लाख १४ हजार ४ सय ९९ जना संक्रमित छन् । संक्रमितमध्ये २ लाख १२ हजार १८ जना उपचारपछि घर फर्किएका छन् ।
संक्रमणमा रहेका ७ लाख ४९ हजार ३ सय २२ जना विश्वका विभिन्न अस्पताल, क्वारेन्टाइन र आइसोलेसनमा भर्ना भएर उपचार गरिरहेका छन् । जसमध्ये ३७ हजार ६ सय ९८ जनाको अवस्था गम्भीर छ ।
चीनको वुहानबाट शुरु भएको कोरोना भाइरसको महामारीले अहिले सबैभन्दा बढी अमेरिकालाई प्रभावित बनाएको छ । अमेरिकामा २ लाख ४४ हजार ४ सय ३३ संक्रमित छन् । २४ घण्टामा मात्रै अमेरिकामा २९ हजार ४ सय ३० जनामा संक्रमण देखिएको छ । अहिलेसम्म अमेरिकामा ६ हजार ६३ जनाले ज्यान गुमाएका छन् ।
त्यस्तै सबैभन्दा बढी मृत्यु भएको इटालीमा १३ हजार ९ सय १५ जनाले ज्यान गुमाएका छन् । १ लाख १५ हजार २ सय ४२ जना संक्रमित छन् ।
तेस्रो धेरै संक्रमित भएको मुलुक स्पेन हो । स्पेनमा अहिलेसम्म १ लाख १२ हजार ६५ संक्रमित छन् । अहिलेसम्म १० हजार ३ सय ४८ जनाले ज्यान गुमाएका छन् ।
बितेको २४ घण्टामा फ्रान्समा धेरैको मृत्यु भएको छ । १ हजार ३ सय ३५ जनाले ज्यान गुमाउँदा कोरोनाकै कारण फ्रान्समा ज्यान गुमाउनेको संख्या ५ हजार ३ सय ८७ पुगेको छ । फ्रान्समा ५९ हजार १ सय ५ संक्रमित छन् ।एजेन्सी
