कञ्चनपुर – भौतिक पूर्वाधार मन्त्रालयका सचिव सुरत कुमार बम नेतृत्वको प्राविधिक टोलीले कञ्चनपुरको दोधारा चाँदनीको बाढीग्रस्त क्षेत्रको स्थलगत निरीक्षण गरेको छ ।
शुक्रबार दोधाराचाँदनी नगरपालिका–३ पटराखल्ला, वडा नम्बर ८ सुन्दरनगर र वडा नम्बर १० को १८ नम्बर पिल्लर बस्तीको स्थलगत निरीक्षण गरेको हो । जोगबूढा नदीको कटानको दीर्घकालीन समाधानका सम्भावना पहिल्याउन जनप्रतिनिधिसहित प्राविधिक टोलीले निरीक्षण गरेको छ । सुदूरपश्चिम प्रदेशका पूर्वमुख्यमन्त्री राजेन्द्र सिंह रावल र आन्तरिक मामिला तथा कानुन मन्त्री हिरा सिंह सार्की पनि बाढीग्रस्त क्षेत्रको निरीक्षणमा पुगेका थिए ।
प्राविधिक टोलीलाई बाढीग्रस्त क्षेत्रको स्थलगत निरीक्षण गराएर समस्या समाधानका लागि अग्रसर बनाउन खोजिएको हो । जोगबूढा नदीमा पक्की तटबन्ध निर्माण नहुँदा वर्षेनी कटान र डुबानको समस्या झेल्दै आएका छन् । असार तेस्रो साता आएको बाढीले क्षति पु¥याएको क्षेत्रको पूर्वमुख्यमन्त्री रावल नेतृत्वको टोलीले यसअघि पनि निरीक्षण गरेको थियो । निरीक्षण पश्चात् डुबान र कटानको समस्यालाई समाधान गर्न रावल सक्रिय छन् ।
प्रदेश सभा बैठकमै उनले बाढी र कटानको मुद्दा उठान गरेर सरकारको ध्यानाकर्षण गराएका थिए । कञ्चनपुरको भीमदत्त नगरपालिकास्थित चुरे फेदमा पर्ने ब्रह्मदेव बजार डुबानको समस्या र खन्या खोलाको कटानको अवस्था निरीक्षण गर्न भोली प्राविधिकसहितको टोली त्यहाँ जाने छ ।
साभार : नेपालबोध डटकम
