भदौ ९ काठमाडौँ । खोप उत्पादनसम्बन्धी उद्योग स्थापना गर्न कर्जा माग भएमा बैङ्क तथा वित्तीय संस्थाहरूले व्यावसायिक योजना मूल्याङ्कन गरी आधार दरमा कर्जा उपलब्ध गराउने भएको छ ।
नेपाल राष्ट्र बैङ्कले मङ्गलबार एकीकृत निर्देशिका जारी गर्दै महामारीजन्य रोगको उपचारका लागि नेपाल सरकारबाट मान्यता प्राप्त खोप उत्पादनका लागि उद्योग स्थापना गर्ने प्रयोजनका लागि कर्जा माग भएमा बैङ्क तथा वित्तीय संस्थाहरूले व्यावसायिक योजना मूल्याङ्कन गरी आधार दरमा कर्जा उपलब्ध गराउनुपर्ने व्यवस्था गरेको हो ।
कोभिड–१९ बाट अतिप्रभावित सार्वजनिक यातायात व्यवसायीलाई सवारीसाधन सञ्चालन तथा मर्मत सम्भारका लागि दुई लाखसम्म थप कर्जा प्रदान गर्न सक्ने व्यवस्था निर्देशिकामार्फत गरिएको छ ।
राष्ट्र बैङ्कले कोभिड–१९ बाट अतिप्रभावित क्षेत्रहरूमध्ये रेस्टुरेन्ट, पार्टी प्यालेस, सार्वजनिक यातायात, शिक्षण संस्था र मनोरञ्जन व्यवसाय तथा नगद प्रवाह अवरुद्ध भएका लघु, घरेलु, साना तथा मझौला व्यवसायीलाई असर मूल्याङ्कन गरी साँवा तथा ब्याज दायित्वलाई एक वर्षसम्म म्याद थप गरी कम्तीमा चार किस्तामा असुली गर्ने व्यवस्था मिलाउनुपर्ने व्यवस्था गरेको छ । यस्तो ब्याजलाई पुँजीकरण गर्न नपाइने तथा पेनाल ब्याज नलाग्ने व्यवस्था मिलाउनुपर्ने समेत निर्देशिकामा उल्लेख छ ।
