कञ्चनपुर ११ भाद्र
रसुवाको भोटेकोशी नदीमा आएको बाढीबाट प्रभावित नागरिकको उद्धार तथा राहतका लागि महेन्द्रनगरमा फार्मेसी सञ्चालन गर्दै आएका दिपेन्द्र सिंह महराले १ लाख रुपैयाँ आर्थिक सहयोग गरेका छन्।
बाढीबाट प्रभावित परिवारको उद्धार, राहत तथा पुनःस्थापनामा सहयोग पुगोस् भन्ने उद्देश्यले महराले प्रधानमन्त्री दैवी प्रकोप उद्धार कोषमा रु. १ लाख सहयोग गरेका हुन्। रसुवामा आएको बाढीपछि सरकारले समेत उद्धार तथा राहतका लागि आर्थिक सहयोग गर्न आह्वान गरेको छ।
व्यवसायसँगै सामाजिक उत्तरदायित्वलाई समेत प्राथमिकता दिँदै आएका महराले विपद्को समयमा पीडित नागरिकलाई सहयोग गर्नु सबैको साझा दायित्व भएको बताए।
उनको यो सहयोगले रसुवाका बाढीपीडितको उद्धार तथा राहतमा केही भए पनि योगदान पुग्ने विश्वास गरिएको छ। व्यक्तिगत तथा व्यावसायिक क्षेत्रबाट विपद् प्रभावितका लागि सहयोग जुटिरहेका बेला महराको १ लाख रुपैयाँको सहयोगलाई मानवीय सेवाको उदाहरणका रूपमा लिइएको छ।
‘विपद्को समयमा पीडितको साथमा उभिनु नै मानवीय धर्म हो’ भन्ने भावनासहित गरिएको महराको यो सहयोगले अन्य व्यवसायी तथा सामाजिक व्यक्तित्वलाई समेत सहयोगका लागि प्रेरित गर्ने अपेक्षा गरिएको छ।
