कञ्चनपुर, २३ साउन ।
कञ्चनपुरको महेन्द्रनगरमा पहिलो पटक निःशुल्क १० दिने बारिष्टा तालिम सुरु भएको छ । होटल संघ नेपाल कञ्चनपुरको आयोजनामा नेपाल पर्यटन बोर्ड तथा यूएनडीपीको सहयोगमा तालिम सञ्चालन गरिएको हो ।
बढ्दो कफी संस्कृति र बजारमा दक्ष जनशक्तिको मागलाई मध्यनजर गर्दै युवालाई सीप प्रदान गरी रोजगारी तथा स्वरोजगारका अवसर सिर्जना गर्ने उद्देश्यले तालिम आयोजना गरिएको होटल संघ नेपालका कोषाध्यक्ष युवराज श्रेष्ठले बताए । उनका अनुसार नेपालमा क्याफे तथा कफी कल्चर बढ्दै गएकाले दक्ष बारिष्टाको मागसमेत बढिरहेको छ ।
कार्यक्रमका सहजकर्ता तथा होटल संघ नेपाल सुदूरपश्चिम प्रदेश कार्यसमिति सदस्य जगदीश चन्द भट्टले महेन्द्रनगरमा पहिलो पटक बारिष्टा तालिम आयोजना गरिएको बताए । युवालाई छोटो समयमै व्यावसायिक सीप प्रदान गरी स्वदेश तथा विदेशमा रोजगारीका अवसर प्राप्त गर्न सहयोग पुग्ने उनको भनाइ छ ।
अगस्ट ७ देखि १७ तारिखसम्म महेन्द्रनगरस्थित गंगोत्री गोल्ड होटलमा सञ्चालन भइरहेको तालिममा कञ्चनपुरका विभिन्न होटल, रेस्टुरेन्ट, क्याफे तथा होटल म्यानेजमेन्ट अध्ययन गरिरहेका २५ जना युवाको सहभागिता रहेको छ ।
छोटो समयमै सिक्न सकिने तथा स्वदेश र विदेश दुवैतर्फ रोजगारीको सम्भावना रहेको बारिष्टा सीप युवाका लागि स्वरोजगार र रोजगारीको नयाँ माध्यम बन्न सक्ने देखिएको छ ।
