कञ्चनपुर, ११ साउन
कञ्चनपुरको भीमदत्त नगरपालिका–८ स्थित प्रसिद्ध धार्मिक स्थल महाकाली शारदा पीठ भम्केनी धाममा सञ्चालन भइरहेको चातुर्मासिक महापुराण तथा श्रावणी मेलामा देशका विभिन्न जिल्लासहित भारतका सीमावर्ती क्षेत्रबाट आएका श्रद्धालुको उल्लेख्य सहभागिता देखिएको छ।
पवित्र श्रावण महिनाको अवसरमा सुरु गरिएको धार्मिक कार्यक्रम अन्तर्गत धाममा दैनिक पूजा–आराधना, कथा प्रवचन, आरती, भजन–कीर्तन तथा विभिन्न धार्मिक अनुष्ठान सञ्चालन भइरहेका छन्। श्रावण महिनाको धार्मिक महत्त्वसँगै दर्शन र पूजाआजाका लागि धाम पुग्ने भक्तजनको संख्या दिनप्रतिदिन बढ्दै गएको आयोजकले जनाएको छ।
प्राचीन सिद्ध वैजनाथ (सिद्धनाथ–बैजनाथ) शिव भगवानको वास रहेको विश्वास गरिने यस धाममा श्रद्धापूर्वक पूजा–अर्चना गरे मनोकामना पूरा हुने जनविश्वास रहँदै आएको छ। यही आस्थाका कारण प्रत्येक वर्ष श्रावण महिनाभर यहाँ ठूलो संख्यामा भक्तजनको आगमन हुने गरेको छ।
महाकाली शारदा पीठ भम्केनी धामका अध्यक्ष इन्द्र सिंह खत्रीका अनुसार मेलाभरि दैनिक पाठ–पूजा, धार्मिक प्रवचन, भजन–कीर्तन तथा अन्य नित्य धार्मिक कार्यक्रम नियमित रूपमा सञ्चालन भइरहेका छन्। श्रद्धालुको उत्साहजनक सहभागिताले धार्मिक वातावरण थप उल्लासमय बनेको उहाँको भनाइ छ।
अध्यक्ष खत्रीले यस मेलामार्फत प्राचीन सिद्धनाथ–बैजनाथ शिव भगवानको पूजा–अर्चनासँगै भम्केनी धामको धार्मिक तथा पर्यटकीय महत्वको प्रचार–प्रसारमा समेत टेवा पुग्ने विश्वास व्यक्त गर्नुभयो।
सुदूरपश्चिमकै महत्वपूर्ण धार्मिक गन्तव्यका रूपमा परिचित भम्केनी धाममा कञ्चनपुर, कैलाली, डडेल्धुरा, बैतडी, दार्चुला, अछाम, बाजाङलगायत जिल्लाबाट मात्र नभई भारतका सीमावर्ती क्षेत्रबाट पनि भक्तजन दर्शन र पूजाआजाका लागि पुगिरहेका छन्।
श्रावण महिनाभर धाममा दैनिक नित्यपूजा, आरती, भजन–कीर्तन, धार्मिक प्रवचन तथा विभिन्न आध्यात्मिक कार्यक्रम सञ्चालन हुने जनाइएको छ। प्राकृतिक सौन्दर्य र धार्मिक महत्त्वका कारण पछिल्ला वर्षहरूमा भम्केनी धाम श्रद्धालुको प्रमुख आस्थाको केन्द्रका रूपमा स्थापित हुँदै गएको छ। यस वर्षको श्रावणी मेलामा समेत भक्तजनको चहलपहल अझ बढ्ने अपेक्षा गरिएको आयोजकको भनाइ छ।
