कञ्चनपुर, १२ वैसाख
कम्युनिष्ट युवा संगठन नेपाल, जिल्ला समिति कञ्चनपुरले भीमदत्त नगर विकास समितिको सरकारी जमिन अतिक्रमण तथा नियम विपरीत गरिएको लिज सम्बन्धी विषयमा गम्भीर ध्यानाकर्षण भएको जनाएको छ । संगठनले बिहीबार एक विज्ञप्ति जारी गर्दै सरकारी सम्पत्तिको संरक्षणमा राज्य उदासीन र बेवास्ता भएको आरोप लगाएको हो ।
विज्ञप्ति अनुसार, भीमदत्तनगर विकास समितिको ६३८ बिघा ८ कठ्ठा १३ धुर सरकारी जमिन र जिल्लाका विभिन्न स्थानमा रहेका सार्वजनिक जग्गामा गैरकानुनी रूपमा कब्जा, अवैध संरचना निर्माण तथा नियम विपरीत लिजका गतिविधि भएकोे बताइएको छ ।
संगठनले पटक–पटक सरोकारवालाको ध्यानाकर्षण गराउँदा पनि सरकारी सम्पत्तिको संरक्षण गर्ने दायित्व राज्यले प्रभावकारी रूपमा निर्वाह नगरेको जनाएको छ । केही व्यक्तिहरूले सरकारी जमिनमा अवैध संरचना निर्माण गरी बसोबास गरिरहेको जानकारी हुँदाहुँदै पनि सम्बन्धित निकाय मौन बसेको आरोप लगाइएको छ ।
कञ्चनपुरका तीनवटै निर्वाचन क्षेत्रबाट निर्वाचित प्रतिनिधिसभा सदस्यहरू, प्रमुख जिल्ला अधिकारी तथा सम्बन्धित निकायलाई संगठनले तत्काल आवश्यक कदम चल््न आग्रह गरेको छ । जिल्ला प्रशासन कार्यालय र अन्य सरोकारवाला निकायले अवैध संरचना हटाउने विषयमा सार्वजनिक रूपमा सूचना जारी गरे पनि कार्यान्वयन प्रभावकारी हुन नसकेको संगठनको भनाइ छ ।
अतिक्रमण गरिएका नगर विकास समितिको जमिन तथा अन्य सार्वजनिक स्थानहरूमा रहेका अवैध संरचना तत्काल हटाई, भेदभावरहित रूपमा कानुनी प्रक्रिया अगाडि बढाउन संगठनले माग गरेको छ ।
संगठनका अध्यक्ष अनमोल ठाकुरीद्वारा हस्ताक्षरित विज्ञप्तिमा वर्तमान सरकारले यस विषयलाई बेवास्ता गरे आन्दोलनमा जान बाध्य हुने चेतावनी समेत दिइएको छ ।
