प्रकाश भट्ट महेन्द्रनगर १५ फागुन।
राष्ट्रिय प्रजातन्त्र पार्टी (राप्रपा) सुदूरपश्चिम प्रदेश कार्यसमितिको आयोजनामा फागुन १८ गते धनगढीमा विशाल आमसभा हुने भएको छ। पार्टीले अन्याय, अत्याचार, भ्रष्टाचार र कुशासनको विरुद्ध जनचेतना फैलाउने उद्देश्यले उक्त आमसभा आयोजना गर्न लागेको हो।
राप्रपाले लामो समयदेखि मुलुकमा व्याप्त भ्रष्टाचार, सुशासनको अभाव र आर्थिक अन्यायको विरुद्ध आवाज उठाउँदै आएको छ। यही अभियानलाई थप प्रभावकारी बनाउन आमसभाको आयोजना गरिएको राप्रपा सुदूरपश्चिम प्रदेश कार्यसमितिका अध्यक्ष धर्मराज जोशीले जानकारी दिए।
नेताहरूको उपस्थिति र विशेष सम्बोधन
धनगढीमा हुन गइरहेको आमसभामा राप्रपाका केन्द्रीय अध्यक्ष राजेन्द्र लिङ्देन, वरिष्ठ नेता डा. प्रकाशचन्द्र लोहनी, नेता दीपकबहादुर सिंह, युवा नेता ज्ञानेन्द्र शाही, पूर्वमन्त्री जयन्त चन्द लगायतका केन्द्रीय तथा प्रदेशस्तरीय नेताहरूले सम्बोधन गर्ने कार्यक्रम तय गरिएको छ।
कार्यक्रमबारे जानकारी दिँदै राप्रपा सुदूरपश्चिम प्रदेश अध्यक्ष धर्मराज जोशीले भने, “देशमा व्याप्त भ्रष्टाचार, कुशासन र राजनीतिक अस्थिरताको अन्त्यका लागि यो आमसभा महत्वपूर्ण हुने छ। अहिलेको व्यवस्थाले जनताका अपेक्षा पूरा गर्न सकेको छैन। व्यवस्थागत परिवर्तनमार्फत मात्रै राष्ट्र समृद्धिको यात्रामा अघि बढ्न सक्छ।”
जोशीले सुदूरपश्चिमका जनताले राप्रपाले उठाएका मुद्दाहरूमा ऐक्यबद्धता जनाउँदै परिवर्तनको पक्षमा साथ दिने विश्वास व्यक्त गरे।
भ्रष्टाचार र अस्थिरताको अन्त्य प्रमुख एजेन्डा
राप्रपाले हाल मुलुकमा राजनीतिक अस्थिरता कायमै रहेको, सरकारहरूमध्ये कुनै पनि भ्रष्टाचारमुक्त नभएको र विकासका एजेन्डाहरू गौण बनिरहेको आरोप लगाउँदै आएको छ। यही कारण, राप्रपाले सुशासन, आर्थिक समृद्धि र पारदर्शितालाई प्राथमिकता दिँदै मुलुकमा नयाँ ऊर्जा दिन चाहेको जोशीले स्पष्ट पारे।
उनले थपे, “नेपालको राजनीतिमा अब शुद्धीकरणको खाँचो छ। हामी सुदूरपश्चिमका नागरिकलाई शासक होइन, सेवकको भूमिका निर्वाह गर्ने नेतृत्व दिन चाहन्छौँ। आमसभाले परिवर्तनको नयाँ लहर ल्याउने विश्वास लिएका छौँ।”
सुदूरपश्चिमवासीलाई सहभागी हुन आग्रह
राप्रपा सुदूरपश्चिम प्रदेश कार्यसमितिले आमसभामा सहभागी भई कार्यक्रमलाई भव्य बनाउन सम्पूर्ण सुदूरपश्चिमवासीलाई हार्दिक निमन्त्रणा गरेको छ। पार्टीले आमसभालाई ऐतिहासिक बनाउन सबै तहका कार्यकर्ताहरूलाई जुट्न आग्रह गरेको छ।
धनगढीमा हुन लागेको यो आमसभा सुदूरपश्चिमको राजनीतिक परिवेशमा गहिरो प्रभाव पार्ने अनुमान गरिएको छ।
