काठमाडौं । भारतको तेलंगानामा एक युवकले कोब्रा सर्पलाई मुखभित्र राखेर बनाएको भिडियो भाइरल भएको केही समयमै उनको मृत्यु भएको छ। २० वर्षीय शिवा राजलु नामका ती युवकले सामाजिक सञ्जालमा लोकप्रिय हुने चाहनामा यस्तो जोखिमपूर्ण काम गरेका थिए।
सडकको बीचमा उभिएर कोब्रालाई मुखभित्र राखेको उनको भिडियोमा सर्पले उनलाई टोक्ने दृश्य पनि कैद भएको छ। सर्पको विषले तत्कालै उनलाई बेहोस बनाएको थियो। नजिकैको अस्पताल पुर्याइए पनि चिकित्सकहरूले उनलाई बचाउन सकेनन्।
शिवाका बुवा गंगाराम पनि सर्प समात्ने काममा संलग्न थिए। उनले नै छोरालाई यस्तो जोखिमपूर्ण काम गर्न प्रेरित गरेका थिए। यस घटनाले सामाजिक सञ्जालको लोकप्रियताका लागि मानिसहरू कतिसम्म जान तयार हुन्छन् भन्ने कुरा उजागर गरेको छ। सर्पविज्ञहरूले यस्ता खतरनाक स्टन्ट गर्नु कत्तिको जोखिमपूर्ण हुन्छ भनेर बारम्बार सचेत गराउँदै आएका छन्।
