महेन्द्रनगर २१ चैत । कञ्चनपुरको कृष्णपुर नगरपालिकाले १ करोड बराबरको विपद् व्यवस्थापन कोष स्थापना गरेको छ ।
विश्वव्यापी महामारीका रूपमा फैलिरहेको कोरोना भाइरसको संक्रमण रोकथाम र नियन्त्रणका लागि बिहीबार कृष्णपुर नगरपालिकामा बसेको बैठकले विपद् व्यवस्थापन कोष स्थापना गर्ने निणर्य गरेको हो ।
नगरपालिकाले कोषमार्फत दैनिकी चलाउन समस्यामा परेका परिवारलाई राहत वितरण गर्ने योजना रहेका नगर प्रमुख कर्ण बहादृुर हमालले बताए ।
उनका अनुसार बैठकले राहत प्याकेज वितरण लगायत अन्य विपद् व्यवस्थापन गर्न एक करोडको कोष स्थापना गर्ने निर्णय हो ।
उनले कोषमार्फत खाद्यान्न समस्या रहेको नगरवासीलाई दाल, चामल, नुन, तेल राहत स्वरुप उपलब्ध गराईनेछ । नगरपालिकाले विपद् व्यस्थापन कोषका लागि विभिन्न सरोकारवाला नियकायसँग अपील समेत गरेको छ ।
नगरपालिकाले सहयोग ईच्छुकले एनसीसी बैंकको कृष्णपुर शाखामा रहेको खाता नम्बर १४८००००००५००१ मा रकम जम्म्म गर्न सक्ने जनाएको छ ।
साथै नगरपालिकाले प्रेस विज्ञप्तीमार्फत पनि कोष स्थापना गरिएको घोषण गरेको छ ।
नगर प्रमुख हमालको अध्यक्षतामा कञ्चनपुरका प्रमुख जिल्ला अधिकारी नुरहरि खतिवडा, प्रहरी उपरीक्षक मुकुन्द मरासिनी र सशस्त्र प्रहरी उपरीक्षक बीर सिंह शाहु समेतको उपस्थितिमा नगर कार्यपालिकाको बैठक बसेको थियो ।
उक्त बैठकले राहत प्याकेज वितरण लगायत अन्य विपद् व्यवस्थापन गर्न कोष स्थापना गर्ने निर्णय गरेको कृष्णपुर नगरपालिकाका प्रमुख प्रशासकीय अधिकृत विष्णु दत्त भट्टद्वारा हस्ताक्षरित प्रेस विज्ञप्तीमा उल्लेख छ ।
